NAMAZ VAXTLARI:
  • FƏCR 04:26
  • GÜN 05:55
  • ZÖHR 12:44
  • ŞAM 19:51
  • GECƏ 00:00
BİZİMLƏ ƏLAQƏ:[email protected] +994 70 4240255
HAVA PROQNOZU:

"Ən böyük məsuliyyət dövlətin rəhbər orqanlarının üzərinə düşür" - Dr. M. Səmədov

Oxundu: 1081

Azərbaycan İslam Partiyasının sədri doktor Hacı Mövsüm Səmədov Qobustan Qapalı Tipli həbsxanadan mənəviyyatımızda baş verənlərlə bağlı fikir bildirib.

 

“İslaminSesi” M.Səmədovun mənəvi dəyərlərimizin cəmiyyətdə aşınması ilə bağlı düşüncələrini oxuculara təqdim edir:

 

“Bağışlayan və Mehriban Allahın adı ilə!

Azərbaycan xalqı sağlam və aydın keçmişə, zəngin tarixə malikdir. Çətin və ağır mərhələlərdən keçmiş bu səhnədə xalqımızı, onun milli mənliyini, fərdi və ictimai-əxlaqi şüurunu qoruyan ən mühüm amil dinimiz və Allaha bağlılığımız olmuşdur.

 

Despot və ateist sovet rejimi toplumun ictimai davranış keyfiyyətini yanlış istiqamətə yönəltsə də, yəni saxta kommunizm ideologiyası hər an təzim olunan bütə çevrilsə də, insanları, fərd olaraq, Allaha, İslam dininə yönəldən ağıl, hiss və iradəni qıra, dəyişə bilmədi. Amma sovet əxlaq kodeksi və normaları, istər inzibati, istərsə də ixtiyari şəkildə, cəmiyyətdə indiki neqativliklərə, mənəvi idbarlığa şəraitin yaranmasına yol vermirdi. Halbuki, o zamanlar da buna cəhdlər az müşahidə olunmurdu.

 

İnsanlarda, xüsusən gənclər arasında fəzilətdən çox qəbahətə meyllilik heç də milli-mental dəyərlərdən irəli gələn məsələ deyil. Nə yaxşı ki, belə mənəvi çirkinlikləri Azərbaycan cəmiyyəti, müsəlman qövmü olaraq, qınayır, qəbul etmir.

 

Bəs, görəsən, ayrı-ayrı fərdlərin bu mənəvi deqradasiyaya məruz qalmasının səbəbi nədir?

 

İlk növbədə, cəmiyyətlə, ailələrlə, birbaşa vertikal aləmlə təmasda olan təbliğat vasitələrinin, təhsil müəssisələrinin, qida və ticarət obyektlərinin fəaliyyətinə qanunvericilikdə təsbit olunmalı nəzarətin həyata keçirilməsindəki boşluqlar, bəzən isə yanlış və idbarlığa təhrikedici addımlara mane olmayan mürtəce qanun və qərarların qəbul edilməsi mənəvi aşınmanı azaltmaq əvəzinə, daha da artırır. Cəmiyyəti ən çox narahat edən məsələ ölkə daxilində hər bir ailəyə açılan səhnə rolunda milli televiziya kanallarının mənəviyyatsız veriliş və şoular təqdim etməsi, müəllif və aparıcıların cəmiyyətin sosial-psixoloji, mənəvi baxımdan qeyri-sağlam, həmçinin intellektual səviyyəsi aşağı olan üzvlərinin milli-mənəvi, dini dəyərlərimizə zidd davranışlarıdır.

 

Xalqımızın milli-mənəvi, dini dəyərlərini ziyalı və alimlər, həqiqi ruhanilər vasitəsilə deyil, bu cür tasadüfi və, bəlkə də, düşünülmüş şəkildə seçilən insanların kütləyə təqdim etməsi indikindən də artıq fəsadlar törədəcəyinə şübhə yeri qoymur. Hazırda keçmişlərindən geylər və geyparadlar qalan Avropa ölkələrində yaşayan insanlar ailələrini, gənclərini qorumaq üçün İslam dininə müraciət etdikləri halda, Azərbaycanımızda Avropanın keçmişinə qayıdış halları müşahidə olunur.

 

Əxlaqsızlığın, intihar faktlarının kütləvi hal alması, orta təhsil ocaqlarına narkotik maddələrin yol tapması cəmiyyətdə baş verən və qarşısı alınmayan deqradasiyanın nəticəsi kimi qiymətləndirilməlidir. Məktəblərdə gənc qızlarımızın hicabına qoyulan süni qadağalar, hicablı xanımların işlə təminatındakı neqativ və yanlış yanaşmaların acı nəticələrini cəmiyyətimiz görür. Təəssüf ki, ictimai qiymətləndirməyə, xalqımızın mənəvi aşınmadan zamanında qurtuluşu üçün ən optimal təkliflərin, təbliğatların icra edilməsinə diqqətlə yanaşmamaq, bu istiqamətdə həqiqi səy göstərənlərin təcrid edilməsi cəmiyyətimizi daha ağır duruma - ümidsizliyə - aparır.

 

Nəhayət unutmaq olmaz ki, deyildiyi kimi, insan digər varlıqlardan, hətta mələklərdən fərqli olaraq, ixtiyar sahibidir. Həm də axı insan həmişə icbarla yaşayan bir varlıq deyil. O, yaxşını da, pisi də, haqqı da, batili də, gözəlliyi də seçə bilir, idbarı da. Sadəcə seçimi onun özünə, onun ixtiyarına versən, yetər.

 

Amma insan bilməlidir ki, istər bu dünyada, istərsə də Axirətdə bütün sorğu-suallar yalnız ona aiddir. Bu baxımdan, ən böyük məsuliyyət və cavabdehlik ailə başçılarından tutmuş, dövlətin rəhbər orqanları və onların başında duranların, cəmiyyətin seçilmiş üzvlərinin, alim və ziyalıların, ruhani və din alimlərinin, dövlət xadimlərinin üzərinə düşür. Çünki cəmiyyətdə baş verən və kütləviləşən mənəvi aşınma hallarını, ilk növbədə, həmin insanlar müşahidə etməli, görməli və operativ addımlar atmalıdırlar.

 

Amma təəssüf doğuran bir halı da qeyd etməliyəm. Bu yaxınlarda ölkənin aparıcı mədəniyyət və incəsənət xadimlərinin, ziyalıların dövlət başçısı və xanımı ilə görüşündə çoxsaylı təkliflər səsləndirildi. Həmin təkliflərin içərisində televiziyalarda, bir sıra başqa səhnələrdə, ümumən cəmiyyətdə baş verən mənfi əxlaqi keyfiyyətlərin, milli-mənəvi aşınmaların səbəblərinin aradan qaldırılması istiqamətində fikirlər eşidilmədi. Bütün bunlardan nəticə çıxarmağın, bir sıra vacib sahələrlə bağlı qanunvericilikdə qanunların təkcə Avropa konvensiyalarına deyil, xalqın mental dəyərlərinə istinadən qəbul edilməsinin vaxtı çatmışdır.”

 

 

Ctrl+ Enter Mətndə səhv var? Onu seçin və "Ctrl+Enter" düyməsini basın

ŞƏRH YAZIN


DİGƏR MÖVQE XƏBƏRLƏRİ

BÜTÜN XƏBƏRLƏR
Orphus system